أي مسلم هيدخل الجنة تمام ؟  

أي مسلم هيدخل الجنة تمام ؟ طيب اتنين واحد مسلم وواحد مسيحي والاتنين ملهمش في الدين ولا أي حاجة عادي يعني تتولد لقى نفسه كده ولا ده دور في دينه ولا التاني بردو ، ليه المسلم يدخل الجنة مع أنه ممكن مايكونش بيصلي أو مقطع أو بيصلي حركات وخلاص والمسيحي يخلد في النار ؟ 
ج /  أهلًا بك يا صديقي.

سؤالك يمكن الرد عليه عبر ثلاث مقدمات :
⭕ الأولى : في الإمكان
يعني أنه عادي جدًا إنسان يتولد في بيئة تديله إمتيازات أفضل وأحسن بكتير من إنسان آخر ، ودا عند كل الناس مش مستنكر ، بس بتيجي عند الدين وتقف ، ولا أدري لماذا!
يعني ممكن شخص يتولد في الشمال الغربي لكاليفورنيا ، ويبقى عنده قصر ووو إلخ ، يعني عنده امتيازات كتير ، وبنقول أنه “أفضل” من شخص ولد في جنوب أفريقيا ، صح؟
يعني مقرين أنه اتولد بميزات أحسن ، مش كده؟
نفس الكلام في الدين ، ممكن جدًا عادي واحد يولد على الدين “الصحيح” وواحد تاني يولد على “الدين الخاطئ” ويبقى اللي ولد على الدين الصحيح دا ، له امتياز ، ودا فضل من ربنا سبحانه وتعالى على عبيده ما يتسألش هو فيه بقى ، زي ما إنت مش بتسأل ربنا على أي نعمة من نعمه ومش بتقول : ليه يارب إديتني إيدين ورجلين وعينين؟ ، وليه يارب ما خلتنيش زي فلان الأعمى وفلان الأصم وفلان الأعرج .. إلخ ، زي ما بتعملش كده ، فنفس الكلام ، الدين الصحيح نعمة من الله على عبد ولد عليه.
⭕ الثانية: في قبح الكفر.
ربنا سبحانه وتعالى بيقول : “إن شرّ الدواب عند الله الذين كفروا” ، يعني أسوأ حاجة موجودة “بيدب على الأرض” هما الكفار أسوأ من الأنعام حتى ، اللي هي البهايم أعزك الله ، فهل مطلوب ربنا يساوي واحد بهذا السوء مع واحد عنده أصل الإيمان ولو كان فيه بلاوي الدنيا؟ هل دا منطق؟
هل اللي معاه مليون جنيه ، حسابه في البنك مفروض يساوي اللي معاه جنيه؟

الكفر والإيمان بقى أكبر من كده ، الإيمان دا هو الواحد اللي بيدي كل الأصفار قيمة ، يعني لو عملت حسنات الدنيا ، ومش معاك الإيمان هيبقى المنظر كده (0000000) ، ولو عملت حسنات قليلة ، بس معاك الإيمان ، هيبقى المنظر كده (10) ، مين أكبر؟
ليه الكفر قبيح جدًا؟

عشان هو باختصار إنكار لفضل الله على العبد ، بقى ربنا يخلقك ، ويرزقك ، ويعطيك من النعم ، وبعدين تروح تعبد غيره؟ ، إزاي طيب؟
⭕ الثالثة : هل ظلم الكافر في الدنيا؟
الإجابة : لأ ، هو ربنا وضح لكل واحد الطريق إليه ، والمؤمن المسلم الموحد سهل جدًا يتعايش مع إيمانه ، بينما المسيحي دينه كل غير منطقي ، وإلا ما كنّاش شفنا موجات تحييد الدين والكفر به والإلحاد هي الأساس في العالم الغربي ، بينما عندنا هي الاستثناء ، حتى لو الناس هناك بتصنف نفسها كمسيحين ، فهو بيصنف نفسه كمسيحي من باب أنه ما يضرش يعني ، مش من باب أنه ملزم وكده.
ربنا سبحانه وتعالى عمل لكل واحد من دول اختبار : واحد ولد على الكفر ، وقال له : في لحظة بس ، في لحظة ، ممكن تقول لا إله إلا الله ، فتتبدل سيئاتك كلها حسنات ، وتخش الجنة من أول وهلة ، زي الرجل اللي كان مع النبي ولم يركع لله ركعة!! ، أسلم ، ودخل المعركة فمات شهيدًا!
والتاني دا ربنا حط له ابتلاء تاني ، أنه يلتزم بأحكام الدين ، لو ما التزمش بيها يستحق العذاب في النار.
والاتنين الطريق قدامهم واضح وبيّن وظاهر ، وأدلة صحة الدين أظهر من أن تخفى أصلًا ، والعصر بتاعنا بالذات عصر انفتاح معلوماتي ومافيهوش الكلام بتاع ما بحثتش وما عرفتش دا.
دا كسّل يتعذب ويخلد في النار لأنه كسّل في حاجة أخطر بكتير من اللي التاني كسّل فيها زي ما وضحت فوق.
فكل واحد فيهم هيتعاقب ، بس جريمة الكافر أكبر بكتير من جريمة التاني ، لأنه كسل في حاجة تخليه مخلد في نار جهنم ، أو يدخل الجنة من أول وهلة ، والتاني كسّل في حاجة تخليه يتعذب كتير آه (ودي حاجة مش سهلة) ، بس معاه “الواحد” اللي بيدي لكل “الأصفار” معنى.
⭕⭕ والحمد لله الذي جعلنا مسلمين. ، اقرأ دا:
س /  هل عندك جواب مقنع عن هذا السؤال الذي طرحه أحد الكتاب: (كيف يمكن أن يُتصور) أن الله خلق مليارات البشر لكي يلعبوا دور الكومبارس في تمثيلية مشهد النهاية فيها أن يدخل المسلمون فقط إلى الجنة؟ 
ج / هو ليه كل واحد الشيطان يركبه يقوم طالع بجملة جامدة وعامل فيها عفريت الساحة؟
ليه بجد؟
هو كده يعني أحرجني بقى ، وأحرج الديانات كلها ، وإحنا واقفين من هول الصدمة بقى ومش عارفين نرد؟
يا جماعة إحنا مش بنعيد اختراع العجلة والله!

وأنت بتسألني عن جواب مقنع وكأن دا سؤال جامد بقى ويستحق الرد!!
عمومًا الشبهة دي أقدم من أن تكون “سؤالًا” يحتاج إلى جواب مقنع!! ، والإجابة عنها موجودة في 8 آيات في المصحف الشريف ، من مطلع سورة الأنبياء!
من زمان خالص!
” وَمَا خَلَقْنَا السَّمَاءَ وَالْأَرْضَ وَمَا بَيْنَهُمَا لَاعِبِينَ (16) لَوْ أَرَدْنَا أَن نَّتَّخِذَ لَهْوًا لَّاتَّخَذْنَاهُ مِن لَّدُنَّا إِن كُنَّا فَاعِلِينَ (17) بَلْ نَقْذِفُ بِالْحَقِّ عَلَى الْبَاطِلِ فَيَدْمَغُهُ فَإِذَا هُوَ زَاهِقٌ ۚ وَلَكُمُ الْوَيْلُ مِمَّا تَصِفُونَ (18) وَلَهُ مَن فِي السَّمَاوَاتِ وَالْأَرْضِ ۚ وَمَنْ عِندَهُ لَا يَسْتَكْبِرُونَ عَنْ عِبَادَتِهِ وَلَا يَسْتَحْسِرُونَ (19) يُسَبِّحُونَ اللَّيْلَ وَالنَّهَارَ لَا يَفْتُرُونَ (20) أَمِ اتَّخَذُوا آلِهَةً مِّنَ الْأَرْضِ هُمْ يُنشِرُونَ (21) لَوْ كَانَ فِيهِمَا آلِهَةٌ إِلَّا اللَّهُ لَفَسَدَتَا ۚ فَسُبْحَانَ اللَّهِ رَبِّ الْعَرْشِ عَمَّا يَصِفُونَ (22) لَا يُسْأَلُ عَمَّا يَفْعَلُ وَهُمْ يُسْأَلُونَ (23) ” 
ثم إيه المطلوب يعني؟

يعني دلوقتي المطلوب أن واحد بيقول : ربنا دا مش موجود ، وما خلقنيش ، الصدفة اللي كونتني ، ومش هأعبده غير لما يظهر لي بنفسه!
واحد غارق في القبح والقباحة والكفر بالله العظيم ، المفروض يعني أنه يخش الجنة؟

طب ليه؟

إيه المبرر يعني؟
واحد بيقول : ربكم اللي بتعبدوه دا ، اتجوز وخلّف ، ومات ، واتصلب ، واتبهدل.

السؤال هنا : هو كده بيحترم اللي خلقه يعني؟

كده يستاهل يخش الجنة مثلًا؟

ما هو أنا مش فاهم برضه معلش!!
واحد كل كلامه ، سب لله وانتقاص منه ومن قدرته ، يوم ما ربنا سبحانه وتعالى الحكم العدل يقرر يعاقبه بذنبه تقول له : معلش يارب ، دا كان كومبارس في تمثيلية هزلية أنت اللي كاتب مشهد النهاية؟
وإيه المطلوب برضه؟

هل المطلوب نقولك أن ربنا ما يعرفش مصائر الناس إما إلى جنة أو نار ونقول أنه “لايعلم” عشان تبقى مش تمثيلية وكومبارس؟
في الكتّاب وإحنا أطفال كنّا بنحفظ سورة الملك ، اللي أولها :
” تَبَارَكَ الَّذِي بِيَدِهِ الْمُلْكُ وَهُوَ عَلَىٰ كُلِّ شَيْءٍ قَدِيرٌ (1) الَّذِي خَلَقَ الْمَوْتَ وَالْحَيَاةَ لِيَبْلُوَكُمْ أَيُّكُمْ أَحْسَنُ عَمَلًا ۚ وَهُوَ الْعَزِيزُ الْغَفُورُ ”
ربنا خلقك وخلق الكاتب الفذلوك دا ، عشان يختبر إيمانكم أنتم الاتنين ، ويختبر إيماننا كلنا ، اللي فاكر بقى أن الدنيا دي فسحة وهو جاي يستنظر علينا ويقول أفكاره العظيمة عن الكون والحياة والإله بعيد عن الوحي ، فدا اختياره ماشي ، بس يفضل مسئول عنه ، مش لعب عيال هو!
يا جماعة الله يكرمكم ، لما تتكلموا عن رب العالمين احترموا شوية أنكم جهلة ، واحترموا قبل ذلك : مقامه.

مش كل واحد تفّ تفة نيجي إحنا نطلب جواب مقنع وبتاع!
(أعذرني لو كنت غضبان شوية ، بس السؤال مستفز جدًا ، وأنا متفهم نيتك تمامًا ، بس الكلام مش موجه ليك شخصيًا بقدر ما هو نفثة مصدور من النمط اللي ماشي في السوشيال ميديا دلوقتي)
الغازي محمد

Advertisements

نصائح لازم تقرأها قبل ‘ الاربعين ‘

​نصائح لازم تقرأها قبل ‘ الاربعين ‘ :

1- استقل ماديا على اد ما تقدر ، وحاول انك دايما ‘تعرف مصروفاتك’وتسيطر عليها وتعرف فلوسك بتروح فين وبتيجى منين ، ليه دا مهم ؟

لان التعامل مع الفلوس مهاره مش بيتقنها ناس كتير وبتاخد وقت وكل ما اتعلمت المهاره دىوفى سن صغير كل ما هتبقى شاطر وعندك حريه واستقلال مادى بعدين .
2 بمناسبه الفلوس ، متدورش على وظائف بتجيبلك دخل عالى وخلاص ، دور على وظائف بتديك خبره ومهارة وملهاش سقف فى الترقيات بتاعتها ،

مثال ( موظف كول سنتر ) مثلا وظيفه دخلها حلو نسبيا لكن ليها سقف مهما زادت سنين خبرتك برضو مرتبك مش هيزيد اوى 

مثال ( مندوب مبيعات) وظيفه مرتبها قليل نسبيا لكن كميه المهارات والعلاقات الى هتاخدهم منها وفهمك للتحديات فى الحياه هيديك الفرصه انك ممكن تنتقل لاى شركه واى وظيفه واى مكان فى المجالات المختلفه لو خبرتك زادت .
3 حوش ما لا يقل عن 10% من دخلك الشهرى — ادفنه- فى بير كدا ولا كانك قبضته وانساه ، المبلغ دا فى سنين ال2عشرينات هيفيدك جدا لو فكرت تعمل مشروع او حصلتلك كارثه ، او حتى جيت تتجوز فاحتجت حاجه زياده لشقتك وحياتك * هيفيدك اوى صدقنى .
4-ابعد عن اصحابك الى بيحبو قعده القهاوى دول فى عشريناتهم هيبقى كلامهم عن ( البنات ، العربيات ، الكوره ، ، السياسه واى حاجه هبله ) وبرضو لما هيبقو 30 وارببعنات هيفضلو يتكلمو فى نفس الكلام ‘بيتكلمو’ وبس وهيعيشو حياتهم يتكلمو ويحلمو مجرد احلام وامانى ،وبيعلقو كل فشلهم على شماعات ( الظروف ، واصل ابويا مسابليش فلوس كتير ، والهبل دا ) صدقنى الناس دى بتعيش وبتموت تعيسه .

دور على صداقات ناجحه وبتنجح وبتنجز اهدافها وكل كلامهم عن مشاريعهم الجايه ومستقبلهم وحياتهم العمليه والماديه هتبقى عامله ازاى 

* خدها من عويس قاعده ( اصحابك بيغيرو ادراكك لمحيطك ) فكل ما نوعيه اصحابك زادت كل ما ادراكك هيزيد .
5- لو بتحاول تبقى رائد اعمال ،ابعد عن انك تشتغل فى شركات كبيره ، بالعكس دور على شركات صغيره لكن ناجحه لانك فى الكبيره ( وان كان مرتبك كبير) بتبقى عباره ‘ ترس ‘ فى مكنه مش عارف هو بيلف ليه ولا بيعمل ايه ،

لكن فى الشركات الصغيره هتعرف وهتشوف الطبخات ماشيه ازاى وهتبقى دايما فى عمليه صنع القرار وفهم السوق كويس .
6- لو بتفكر تعمل مشروعك ، اشتغل الاول عند حد عنده نفس فكره مشروعك ولو بللاش دا بيدى فرصه لنجاح مشروعك كبيره وافتكر 

98% من المشاريع الناشئه بتفشل بعد اول سنتين * احصائيه مبنيه على دراسه مطوله .

ففرص نجاحك هتزيد وتبقى من ال 2 % لو استحملت شويه تعب وعافرت ( وافتكر ان المشروع على الاقل بباخدله سنتين يعافر وبعدين ينجح )
7- متستعجلش النتائج : الشجره بتاخد وقت على بال ماتطلع ثمرتها، كذلك سياستك الماليه وتحويشك دا هياخد وقت وسنين علشان يبان ،

مش مشكله اصبر وحقق نتائج واستمتع بيها بعدين .
8- متشتريش قسط دلوقتى ، تجنب انك تحمل نفسك اعباء ماليه وفواتير وديون من دلوقتى ، خليك خفيف علشان لو حبيت تنتقل من شركه لشركه احسن بس محتاج تاخد كورسات مثلا 3 شهور تقدر تعمل دا وبحريه ، لكن لو ملتزم بكل شهر باقساط ثابته وكتيره مش هتملك الحريه دى ولا القرار دا هيبقى بايدك ، ومش مشكله لو عربيتك موديلها قديم ، اصرف عليها شويه لكن متستعجلش وتشترى واحده جديده على الزيرو قسط وتتسحل فيه سنين .

* متشتريش زيرو لو هتشترى جديد ، اشترى كسر زيرو كاش ، يبقى كدا على الاقل معلكش اعباء ماليه .
9- متشاركش حد متعرفوش اقل من 3 ل 6 سنين ، وابعد عن قاريبك على اد ما تقدر ، متفرحش بالحماس والابتسامه الى على وشه مع الوقت هتكتشف انه شخصيه تانيه وممكن يرمى الشغل عليك ويوقع مشروعك ويخسرك فلوسك ،

قبل ما تشارك حد ، لازم تبقى واكل شارب نايم قاعد شاكب راكب معاه على الاقل كام سنه كصديق وعارف هتبقى تتكلم معاه ازاى لو اختلفتو 

* ومتخليش حد يغفلك ويقولك العقود والقانون ( مصر البيزنيس فيها بينجح بالعلاقات مش بالعقود والقانون زى امريكا ودول تانيه زى السعوديه حتى ) .
10- اصرف على نفسك ، متبقاش بخيل وتقفش فى كل قرش ، دلع نفسك لو بنت روحى سبا بفلوسك الى كسبتيها سافرى سفريه حلوه مع اصحابك ابسطى نفسك . ولو انت كراجل برضو دلع حالك هاتلك حاجه بتحبها كل فتره وروق نفسك وابسطها 

لانك بكدا بترسل رساله للعقل الباطن عندك مفادها (.المجهود والتعب والمعافره دى هى الى بسطتك ونجحتك وجابتلك الى انت عاوزه وبتحبه ) ومن هنا عقلك الباطن هيبقى فرحاااان جدا هيديك طاقه تشتغل بيها تانى وتالت .
11!- البشر كائنات انانيه بطبيعتها ، دى فطرتهم ودا سلوكهم والى لقيته العكس يبقى هو الشاذ فى القاعده .

فمتتعشمش بزياده فى حد والا ‘هتحبط’ جدا ، واربط دايما مصالحهم مع مصالحك وهتلاقيهم بيحبوك وبيخدموك .
1- 12 % بس من اصدقائك الى هو فعلا هيساعدك تنجح * ودى احصائيه مطوله اثبتت دا بالدقه دى 

يعنى اتخيل معايا من كل 100 صديق حواليك 7% بس هيبدو استعدادهم انهم يساعدوك و 1% فقط هو الى فعلا هيساعدك والباقى ولا كانه شافك ، 

وجرب تنزل بوست عندك تطلب مساعده وشوف من وسط ( 1000) فريند كام هيرد وكام واحد فعلا هيساعدك .
13 متضيعش وقتك فى انك تكون علاقات بقى ، لكن استثمر وقتك انك تطور من نفسك ، وبالتالى هتكون ناجح وقوى ولما تطلب مساعده من حد وقتها هيديهالك بدون تردد ( لانه عارف انك هتردهاله فى المستقبل ) . 
14-الناس بتحترم جدا الشخص الناجح ، وبتحب تكون حوالين القوى علشان تستمد منه قوتهم ، فخليك قوى لنفسك اولا وللى بتحبهم وللى حواليك ،

وقوتك هنا هتستمدها من اد ايه انت مستقل وناجح فى مجالك وتقدر مش بس (تعول) نفسك ، لا كمان تقدر تعول غيرك .
15- اقطع علاقتك فورا وبدون تردد بالى بيحبطوك ، والى ببخوفوك من حلمك ، والاهم ابعد عن الى بيعجزوك ، لانك كدا كدا هتقطع علاقتك بيهم فى المستقبل بس وقتها هيكونو هما الى بعدو عنك (وانت فاشل وضعيف ومحققتش اى حاجه ) فابعد عنهم واشتغل على نفسك كويس جدا وطارد حلمك .
16- متخافش من الاخطاء ، دا اكتر سن تقدر تعمل فيه اخطاء ومغامرات مجنونه وتاخد مخاطرات علشان تتعلم كويس لفتره النضج والاستقرار فى ال 30 ، وكمان مسؤليتك لسه بسيطه وانت فى السن دا .
17- الانجلش ، دا لازم يكون لغتك التانيه الان *( 90% من الابحاث العلميه مكتوبه باللغه الانجليزيه وال 10 % الباقين هما بقيه لغات العالم مجتمعين ) احصائيه .

*) اامحتوى العربى على الانترنت لا يتعدى ال 1 % ودى احصائيه برضو ، فالانجلش هو مفتاحك للنجاح فى اى مجال هتدخله .
18- بمناسبه النجاح والمجال ، جرب على اد ما تقدر مجالات مختلفه قبل سن ال 25 ، اشتغل ان شاء الله خمسين شغلانه ، لكن بعد ال25 ركز انك تكون محدد فى مجال واحد وتاخد خبره قويه فيه ، *( لان الخبره هى الى بتحدد مرتبك ودخلك بعد كدا ) فجرب ، ركز ، طور من نفسك ، اخلق لنفسك فرص كويسه بعدين .
19- خبط على 100 باب ولو اتقفل يبقى اعرف انك لسه قدامك 1000 باب كمان ، اوعى تتعامل مع الرفض انه علامه فشل ابدا، الرفض جزء من عمليه نجاحك وحتى وقوعك وفشلك مره واتنين وتلاته مش معناه انه جه وقت استسلامك ابدا بالعكس افتكر انه هنا فرصتك فى النجاح زادت
20- اهتم بصحتك جدا ، وافتكر ان عاداتك الغذائيه فى سن ما تحت ال30 هى الى هتشكل مصيرك الجسدى لبعدين ، ولو اهملت فى نفسك فرصك فى الاصابه بامراض السكرى والضغط بتزيد بعدين . فمارس رياضه بانتظام وكل اكل صحى وبرضو متحرمش نفسك من اى اكله مش صحيه لو نفسك فيها ، بس متفتريش كفايه يوم او يومين فى الاسبوع تعك فيهم ، وسيب جسمك يتعافى بقيه الاسبوع وياخد ( مغذياته) .
21- متجربش المخدرات او الخمور ، دا لو مجربتش ، ولو جربت يبقى خلاص بطل ووقف لانها بتدمر مستقبلك فى التلاتينات والاربعينات ، وافتكر ان كل المدمنين لاى مخدر فى العالم ابتدو دايما بفضول ( التجربه ) دا ، ولو عايز تجرب حاجه مجنونه ، جرب حاجه تفيدك جسديا زى انك تجرى ماراثون او تجرى فى المطر وعز التلج ، او تتطوع فى جمعية تنمويه وتعلم 1000 واحد القراءة والكتابه ، شوف اد ايه هتبقى مبسوط وشوف اد ايه هتحس بانك ( ناجح وانسان ) .
22 – ’ الحب لوحده مش كفايه ’ : اعرفى وافهم ’’خصوصا البنات ’’  ان الحب جزء من حاجات كتير زى ( التقبل , الاحترام , الطموح , التواصل , العاطفه , وحاجات تانيه ) وكل دول زائد ’ الحب ’ جزء من العلاقه العاطفيه , والعلاقه العاطفيه جزء من حياتك 

فى شغلك وحياتك واهلك وعلاقتك بربنا وحتى علاقتك بجسمك وصحتك وطموحك المادى والعملى . 

* فمتنساش ( الحب مش كل حياتك ) ولا هتزعل اوى اوى اوى بعدين . 
23 – اول علاقه عاطفيه بنسبه 90 % بتفشل والتانيه بنسبه 60 % برضو بتفشل , ودا شيئ صحى بالمناسبه وبيفيدك فى علاقاتك التانيه فى المستقبل . 

فمتزعلش لو فشلت فيهم , ولو نجحت يبقى انت كنت محظوظ . 
24 ’ لازم تكون مقتنع 100 % ’ بشريك حياتك كاملا , سواء جسديا او عاطفيا او حتى فى طموحه العملى وحياته المهنيه . 

اى خلل بيكون فى بدايه العلاقه للأسف لو معالجتوش صح بيفضل يكبر . 

ولو حسيت انك مش مقتنع 100% بيه فى البدايه يبقى ادى لنفسك وقت قبل ما ترتبط ارتباط طويل الامد . 

25 – عبر عن مشاعرك للى بتحبه وبتعشقه باستمرار , عبر حتى عن مشاعر الغضب منه لو زعلت , دى حاجه صحيه وبتخلى شريك حياتك يفهم انت حاسس بايه , وكمان حابب تعالج مشاكلك معاه ازاى  . دا شيئ صحى جدا فى العلاقات . 
26 – قبل الارتباط الرسمى بتيجى مرحله ( تردد ) وخوف مؤقت  , دا طبيعى جدا يحصل لكن ذكرياتك مع الطرف التانى , وكمان نظرتك ورؤيتك لمستقبلك بتطغى علي التخوف دا 

لو حسيت ان التخوف دا مقلش وبيزيد باستمرار واتحاول ( لتردد مزمن ) يبقى انت هنا عندك مشكله ما ومحتاج ’ تقيم العلاقه ’ من اول وجديد . 
27 – متنبهرش بالشكل : والنصيحه دى للولاد والبنات الى بينبهرو فى المظهر الخارجى للشخص  ( وبالرغم انه مهم ) لكن افتكر انك لما هتتعب مش هتنام فى حضن الفستان وهتتناقش مع الاكسسوارات الواو التحفه الى عليها . لكن شخصيتها وعقلها وطموحها وقوتها . 
28 – خدو الأرتباط ( خطوه بخطوه كدا ) وبلاش جو انا شوفتك امبارح ومعرفتش انام فحبيتك النهارده ولازم اقولك والجو دا . دى مش علامه ’ نضج عاطفى ابدا ’ 

لكن الصح انكو لو زمايل , تبقى توضحلها ان فى رغبه فى تكوين مشاعر ناحيتها 

وتتعرف عليها وبعدين تدخلو فى مرحله ( الاعجاب ) وبعدين ( الاعجاب الشديد ) وبعدين ( الحب ) وبعدين ( العشق ) ولو ربنا كرمك وعايز تشوف بقى الايام السودا 😀 😛 يبقى كمل وادخل فى مرحله ( الأدمان ) وهنا يا هتبقى حياتك ’ جنه  على الارض ’ يا ’ جحيم لا يطاق ’ .
29 – قوى نفسك ’ ماديا ’ على اد ما تقدر اشتغل كتير واعمل فلوس  , سواء للبنات او الولاد 

كتير من مشاكل ما بعد الارتباط بتكون ماديه ومهم تحلوها كويس .
30 – لو اتحطيت فى موقف خيرك فيه الطرف الاخر بينك وبينه ، او بينه وبين حد تانى ،  دايما ، دايما أختااار نفسك …